Treo 680 到手

我部 Treo 650 經過 25 個月不眠不休嘅服役期，明天將可榮休！因為我今日終於都加入埋 Treo 680 個大家庭！唔好以為我成日換機，部 650 可以算係我第一部用得最短時間嘅電話，但都用咗超過兩年，平均每日唔使八蚊，算係過到自己！

唔經唔覺 Treo 680 原來已經出咗五個月，我都真係算好忍得，挨到依家先出手！其實遲遲唔買最主要原因係無時間，唔係無時間去買，而係無時間去做 setup！要知道我部 smartphone 基本上係一部隨身電腦，裝咗超過 160 個大大少少程式，以每個程式平均需約十分鐘時間去做安裝同setting，總共要成 26 個鐘去執番好曬佢地，但重未計軟體安裝在新系統時出現嘅新問題同解決所需時間！呢啲 software 有約三份一係即時要搞好，唔係就會影響日常嘅使用！所以話換機唔係講換就換！

部新機依家叉緊電，預計呢幾日會密密地 set 番啲 program 同順便做埋 update，希望一切順順利利啦！