Mazda8 一個月用後感

唔經唔覺用咗架 Mazda8 經已一個月，行咗都有千七，係時候寫吓啲用後感：

駕駛方面：

Good

• 車身比以前高，比較好睇位
• 加減波好順又方便，有啲打機 feel
  
• 四碟 brake 真係好應，好有安全感
• 因為有車尾泊車鏡頭同前後 sensor，所以泊車完全係享受

Bad

• 風油呔太輕太風油，响高速時相對好飄
• 個真皮呔環好跣手，可能係設計問題，以前架 Omega 都唔覺係咁
• 入灣個感覺好差，好似人車分離，呢個應該係 FF 嘅問題，要啲時間去適應
• kick down 後啲力黎得比較慢
  

設備方面：

Good

• 免匙系統，方便到唔知點講
• 呔盤可以手動教高低
  
• 司機位電窗開合得好爽快
• 司機可以好輕鬆咁响後座出入同上落，七人車真係無得頂
• 自動感光車頭燈，完全唔使理開燈問題
• 車頭燈極光，有時都怕射親人
  
• 自動感應水潑，落兩就會自動開，唔使煩
• 全自動後座電門，我可以長期開住個 Baby Lock 都唔使吓吓落車開門
• 前後三路獨立空調，自己鍾意教幾多度都得
• 中座安全帶裝置完全配合張 Toys"R"Us Car Seat
• 啲杯架多到一打汽水都夠插

Bad

• 嗰四條16吋胎係日本名牌... 「郁啲揩埋」，始終都係對派拉利信心大啲
• 上高速時啲風聲好大好嘈，Service Center 話可能關條胎事
• 司機位安全帶個插位唔知點解總係好鬼難插，如果唔插，個 warning beep 係會唔停咁響
  
• 中排中座同後排中座條安全帶點解唔裝個自動收納裝置，條帶用完之後好難先摺得返入個窿
• 司機位無電動坐椅，教位唔係幾方便
• 只有司機位個電窗可以一按開合，其他要長禁先得
• 中央車窗鎖啟動後連司機位都操控唔倒其他窗，最唔得係呢個設計
• 天窗要保持長按先可以完全關閉
• 無遙控關窗功能、包括天窗，呢個最令我懷念架 Omega
• 左右倒後鏡熄車後要手動禁制先識摺起，重要响限時嘅三十秒內
  
• 因為裝咗泊車鏡頭系統，所以中央倒後鏡相對比較暗
• 無咗電腦計算响油缸啲油重可以行幾遠，著咗油燈都無預算，暫時試過最遠行三十公里
  
• 收音機無自動追台功能，點解十年前嘅 Omega 都會有，依家反而無，重係 Pioneer
• 音響只有最最最基本响每隻門一隻嘅啦叭，搵極都唔見第五隻，小啦叭吖
• 架車咁大都係得一個汽車電插

我無做過乘客，所以唔知啲感覺如何，邊個做過我架車嘅乘客就自動獻身回應兩隻字啦~

用過架八人車之後，個感受就好似住過村屋之後，唔鍾意搬返上樓度住一樣！