第一隻用嘅藍牙係 Nokia HS-3W，賣成六舊幾，因為直覺上認為佢同嗰時用緊嗰部 Nokia 6230 會夾啲！佢係有條 headphone 線連到耳仔，唔用嘅時候粒豆豉係可以黐番落個接收度，好方便！用過先知，佢同部 6230 完全唔啱 key，個 mic 接收唔係好掂，成日比人話我好似响水底講電話，不過我就聽得佢地好清楚！
之後阿 B 醒咗隻 touch 會響嗰隻 BTH-638Z 我玩，收發都好好多，又係用豆豉、又會響，但價錢就平成半！我用嗰隻係白色，用咗都好耐，响保養到期前重換咗條 headphone 線，後黎比佩儀用咗無耐就比佢趺咗~
期間阿彭都整咗隻同 Touch BTR-668 百份百相似嘅 itech 藍芽耳機連收音機我試，都 okay，不過就係太唔方便因為佢真係大舊到無麟！
換咗 Treo 650 之後，以上所有藍牙全部都唔係好得，經常駁唔倒，或者收得好差，最後決定買個 Palm 原廠 Wireless Headset，又要成六舊水，重要係長時間無貨！諗住買佢係因為佢打正 "Treo" 係列，又係藍牙1.2，無理由重有問題吖！但事實並唔係咁，用緊佢嗰時一直掙扎，雖然知道主要係部電話出問題，但真係唔忿氣！
到舊年年中終於曙光初現，因為出咗支援 A2DP 同 AVRCP 嘅 itech Clip R35，覺得佢如果夾倒部電話行呢兩個 Profile 聽歌，電話嗰 part 實會無問題啦！可能我對聽歌嘅要求唔高，我覺得用佢經藍牙聽歌真係好正，用黎講電話都算滿意，但個問題係佢一半一半機會連接到，仍然好唔穩定，後黎因為條單耳筒燒咗，又配唔番，所以都係拎番上面隻原裝 Headset 黎用！頂住先！
早個星期，終於都換咗部 Treo 680，但係個藍牙問題似乎都未如想像仍然未有一個滿意嘅效果！無論用隻原裝 Headset 或隻 R35，都仍然有比電話中嘅另一方投訴，話聽唔清我講乜！會唔會你都有份！？痛定思痛，決定再下海，入過一隻！用咗三個鐘頭响網上搵料，睇 review，最後鎖定呢隻 Plantronics Discovery 665，佢唔平，但整體口碑非常好，同個價錢成正比，又有 DSP，重係得嗰 9 grams，最重要係佢寫明同 Treo 650/680 夾！同時 Discovery 665 係專比車用，因此我正在考慮裝個 car kit 嘅計劃亦可擱置！
用咗隻新牙一整日，都好滿意，一駁即上，收電話又快 (相比之前)，又輕，終於都體會番一隻藍牙耳機應提供嘅 "Handsfree" 嘅功能同好處！唔好笑我，所有用過 Treo 650 加藍牙耳機嘅人都會好明白我個心情~～
2 則留言:
喂，你唔做 Sales 真係0徙晒!!一於去兼職賣耳筒啦!
拿拿拿~ 還掂行過，幫趁買個，平啲比你~
發佈留言