Google Map

一直有留意 Moming 嘅 Google Maps HK Search，佢寫嘅功能真係好正好好用！

無睇過 Google Map 個 official site 一段時間，原來佢已經有中文，重可以計算行車路線。呢樣嘢都幾有用，可以用黎做一啲指示！下面條 route 就係用起點同目的地 set 出黎嘅效果，條 link...


得閒再詳研究吓先~

胡車隊

又見到窗外有直昇機停浮半空，即時聯想到可能胡主席又响左近！再睇睇下面隧道口，封曬路咁，重會係第二樣嘢咩！

果然不出所料，車隊一如上次運送熊貓咁，經灣仔海旁再經隧道口上堅拿道天橋！係喎，佢今日會去海洋公園喎！行番熊貓條路睇熊貓，完全理解~





明報即時新聞

遊行、封路？！

駕咗車咁多年，試過多次遇到封路，尤其有交通意外。記得有次封咗海底隧道，見到十架八架鐵馬幫支英國旗開路，好似話係大鼻皇子黎！

尋日又再遇到封路，响太和路汀角路交界！成個十字路口封曬，全部車都唔行得。如果唔係有三幾架鐵馬响度，我都會有火，因為我嘅目的地就係响前面唔夠100公尺，而我重係响燈口前嘅第三架，如果之前比多少少油都可能避過到一劫！

就响呢個位置停咗十多分鐘後，就開始聽到打鑼打鼓聲！噢！原來係有遊行！唔好搞錯，唔係遊行抗議，係有舞龍舞獅嗰啲，後面重見到有陸上扒龍舟，相信係同端午有關嘅慶典！佢條龍重好鬼長，我諗超過三十公尺，咁長嘅龍我都只係响電視見過，今次就親身經歷！雖然塞咗前後差不多半個鐘，都終算叫做有啲娛樂啦~

父親節‧車

今年是應該係第三次做主角的父親節，但其實我一次都未做過，因為啲仔女都未識得呢樣嘢呀！

不過今年就响呢個父親節收到第一份父親節禮物，係上星期阿仔响學校做嘅勞作~


都唔記得上兩年有乜嘢搞過，但今年一早就返咗公司做嘢。到下午就同佩儀去咗一個我自己預備嘅節目，就係參加一個由萬事得搞嘅 Mazda8 車主聚會。佢個 invitation 話係講解部車嘅結構、保養，重有車底介紹，個內容咁吸引緊係去啦！個聚會又確實唔錯，交流咗唔少嘢！之後唔知會唔會重有呢？！個聚會重有抽獎，得頭、二、三獎，我呢，就係咁好彩，抽中三獎，係一對 Mazda Crystal Glass，都好，當係第二份父親節禮物啦！頭獎就無乜興趣，係部 iPod Nano，如果係汽車音響就正啦~

不過真係估唔到响呢個聚會相認咗一個泊响同一層停車場嘅 Mazda8 車主 Martin，我泊响最前，佢就泊响最後！佢架車買早我一個月，我訂咗車之後先發現有呢部車泊同一個停車場，重係我鍾意嘅黑色添。佢話佢買嗰時同埋其他同事一次過出咗三部，犀利！重有，個二獎，五舊水 Caltex 油券就係比佢抽中咗呀！咁鬼好彩！

尋日大會都有影相，但都唔知有無得睇番，佢地個網頁又完全無呢啲嘢，搵到再補 post 啦！

Mousse

一直都有用 mousse，而近幾年所用嘅呢隻 mousse 係來自澳洲，經 Keith 走水貨返黎！

揀中呢一隻係因為二仟年去 Sydney 世界賽時無得用，就响當地 supermarker 入咗幾支唔同牌子黎用，點知發覺呢隻 Wella 好正，又唔黐笠又平！返到香港之後居然揾唔倒有得賣，咁零一年再去澳洲 Darwin 時就諗住入番啲，但點知走勻成個 Darwin 都唔係幾搵到，總共都係得嗰三幾支咁多，可能嗰度太僻，無入貨，話唔埋嗰次已經一次過比我買曬。

之後知道 Keith 久不久會去澳洲走轉去 mark 住依家個老婆，我當然搭佢順道幫我睇睇重有無啲剩餘物資！點知佢幫我大量入貨，成打咁拎返黎，就係咁我一直有得用，直到早兩日，終於全部用罄！

依家煩啦，Keith 已經搞掂咗個老婆，唔使再去澳洲，唔知重有無人會經常會去澳洲 mark 女友呀咁 (如果唔係邊有時間幫我去搵呀)，如果有就順道幫我入啲貨啦！唔該！