Plasma TV

考慮咗好耐換電視，現在用緊呢部 29" Toshiba 都有七年，而兩個小朋友開始多咗睇，覺得傳統電機對佢地對眼又唔係太好，同埋好驚佢地唔覺意打爆或者拉跌現在呢部電視，因為佢成一百磅，睇吓變咗型嘅電視櫃就明架啦！

薄屏電視我一直都只係考慮 Plasma，何解？原因係：
一、佢黑色就係黑色，唔係灰
二、睇 video 無殘影，咁有時都會玩吓 PS2 呀
三、企响乜嘢角度睇都唔會偏色

好多人話 Plasma 最大問題係個 screen 壽命短、機價貴、解像度低同埋維修貴。係，我都同意，所以遲遲都未買！

但終於比我等到啦！就係呢部 42" Panasonic TH-42PY700H！Full HD！

部機都真係幾貴，開價成兩萬四 $_$，而普通 42" LCD TV 都係萬幾！

無意中响 Pana Shop 發現有 promotion，重送埋一套 Panasonic 嘅家庭影院音響系統，成三仟幾，重有，個價減到兩萬，同埋可以信用咭廿四個月免息分期，重有重有，五年上門保養，一次過釋放曬我嘅疑慮 @_@ 心動就不如即刻行動．．．

依家等緊送貨啦 ^_^

Panasonic TH-42PY700H Review

iPod Accessory

部 iPod touch 玩咗差不多一個月，覺得佢就係欠缺一樣最重要嘅嘢，就係喇叭！

點解咁講呢？係因為部 iPod touch 嘅另一個經常用家．．．Alvin，好多時都係响返、放學途中用黎睇片，但個 headphone 又配合唔倒佢隻小小耳朵，經常跌出黎，而我架車又無 iPod 配件，將音效駁去汽車音響。

其實我一直都有插落 headphone 位用嘅 FM Transmitter，但效果奇差，只係叫做好過無！都睇過吓出開 Apple 產品嘅 Belkin FM Transmitter，但．．．成四五佰蚊，點買呀！

今日行行吓黃金，無意中發現呢件嘢，係佢啦！個 packing 都重好好樣添！即場試過機，得喎，$89，即比~



放落部 iPod touch 後就由部機直接供電！由汽車音響接收嘅訊號總算 okay！隻 transmitter 重有一個車叉跟，可以用佢叉番部 iPod touch，都算抵買~

我的 AV Center - Apple TV

用咗 iPod touch 之後，被 Apple 的產品吸引住。想在屋企搞個簡單嘅 solution，用電視黎睇相，睇 video 同播音樂，在 Mac mini 同 Apple TV 之間，選定了 Apple TV。

我所考慮嘅，係佢個介面簡單易用，唔識電腦都可以操作，而屋企中要操作佢而唔識電腦嘅就係我個仔同我阿媽~



Apple TV